прапорщик

орыс армиясындағы ең кіші офицерлік шен. І Петр кезінде тұрақты армияда ту ұстаушылар-ға берілген. 1884 жылдан 1917 жылға дейін П. атағы запастағы офицерлерге және прапорщик мектебі мен әскери училищені соғыс кезінде бітірушілерге берілген. Бұрынғы Кеңес Армиясында КСРО Жоғарғы Кеңесі Президиумының 1971 ж. 18 қарашадағы мерзімнен артық әскери қызмет етушілер институтының орнына прапорщиктер мен мичмандар институты енгізілді. П. және мичман деген әскери атақ әскер қатарына алынып, арнаулы курстарды бітіргеннен кейін немесе әскери мамандыққа сәйкес жоғары және арнаулы орта білімі бар адамдарға беріледі. Сонымен қатар П. және мичман деген атақ кесімді мерзімнен тыс Қазақстан Қарулы Күштері қатарында қызмет етуге қалғандарға және П. болып қызмет етуге тілек білдірушілерге беріледі. П. пен мичмандардың қатары сарбаздар, матростар, сержанттар, старшиналар, сондай-ақ мерзімді әскери қызмет өткерген, арнаулы дайындықтан өткен, жоғары немесе арнаулы орта білімі бар тілек білдірушілермен толықтырылады. Бұл қызметке ерікті түрде жасы 35-тен аспаған запастағы сержанттар мен старшиналар да алынады. П-тер мен мичмандардың әскери қызмет атқару мерзімі – 5 жыл. Осы мерзім өткен соң П-тер мен мичмандардың қызмет ету мерзімі олардың өз тілегі бойынша 3 немесе 5 жылға ұзартылады. П-тер мен мичмандар әскери қызметте 45 жасқа дейін бола алады. Одан соң запасқа шығады. Өте қажет болған жағдайда бұлардың кейбіреулері тағы да 5 жылға әскер қатарында 45 жастан соң да қалдырылады. Қарулы Күштер қатарында 25 жыл немесе одан да артық мерзім мінсіз қызмет атқарған және Отан алдындағы ерекше еңбектері үшін жыл мерзіміне қарамай оларға запасқа, отставкаға шыққанда да әскери киім киюге рұқсат берілуі мүмкін.